عید ‏الضحیٰ ‏مبارک ‏

تمام دنیا میں موجود مسلمانوں کو عید الضحیٰ کی خوشیاں مبارک ہوں کہ یہ دن خوشگوار خوشیاں اور یادگار لمحات عطا کرتا ہے ۔ عید الضحیٰ ایک ایسا تہوار ہے جب بہت بڑی تعداد میں موجود انسان سال میں ایک بار پیٹ بھر کر گوشت سے لطف اندوز ہوتے ہیں اور پھر آئندہ سال کے انتظار میں پرامید بھی رہتے ہیں ۔ جب سب خوش نظر آتے ہیں یا نظر آنے کی کوشش کرتے ہیں تو مجموعی طور پر ماحول خوشگوار سا نظر آتا ہے اور اس تہوار سے وابستہ دیگر رسومات بھی اپنی نوعیت میں ایسی ہوتی ہیں جو خوشیاں مہیا کرتی ہیں ۔  عید الضحیٰ جو عید الفطر کے دو مہینے دس دن کے بعد آتی ہے مکمل طور پر ایک ایسے تہوار کا احساس بھی دیتی ہے جو غریب طبقے کے لئے بوجھ بھی نہیں بنتا ہے ۔ اس تہوار کو ہمیشہ سے غریب آدمی سادگی سے منانے کی کوشش کرتا آیا ہے کیوں کہ وہ عیدالفطر کے بنے نئے کپڑے استعمال کرلیتا ہے اور ان کپڑوں کو وہ نیا ہی سمجھتا ہے جبکہ معاشرے میں ایسا طبقہ بھی موجود ہے جو ایک بار کے پہنے ہوئے کپڑے دوبارہ استعمال نہیں کرتا ۔ اس عید کو سادگی سے منانے کا سرکاری اعلان بھی کردیا گیا ہے اور پہلی بار دکھانے کی حد تک محسوس بھی کیا جاسکے گا ۔  عید الضحیٰ مسلمانوں کو یہ پیغام بھی دیتی ہے کہ وہ اجتماعی انداز میں ایک دوسرے کے دکھ درد میں شریک ہوں اور کوئی اس موقع پر بھوک محسوس نہ کرے اور سماجی دوری برقرار رکھتے ہوئے ایک دوسرے کے بہت قریب بھی آئیں ۔